WILLEMSTAD.- Ayera tardi e namorada di un dje sospechosonan prinsipal den kaso asesinato di lider polítiko di Pueblo Soberano, Helmin Wiels, a yega Kòrsou. Ta trata di e muhé di inisial D.A.C.M. di 32 aña, ku a yega ayera tardi riba buelo di KLM for di Ulanda.
Segun fiskal Guiano Schoop, D. M. ta ser sospechá di labamentu di plaka en konekshon ku kaso di asesinato di Helmin Wiels dia 5 mei 2013. No a spesifiká den kua kaso, si ta trata den esun Magnus òf Maximus. Pero si a bisa ku e ta sospechoso den e kaso aki. Dos siman pasá D.M. a keda detené na Ulanda.
D. ta namorada di e sospechoso Luigi Florentina alias Pretu, na momentu el a fayesé. Pretu (defuntu) tabata un dje sospechosonan masha importante den e kaso aki, yakutaeabuskaeasesino i tambe shofùr di outo pa por a bai te Marie Pampoen pa a likidá e lider polítiko.
Pretu tambe t’esun ku a risibí sèn pa paga esnan ku a mata Wiels. Sinembargo awe Pretu no tei (a hañ’é morto den su sèl na Barber), pa por aklará kon tur kos a bai. A keda su amigu Burney “Nini” Fonseca, kende no ta dunando niun deklarashon di ken a paga òf no. Nini a nenga e akusashon i ta mantené su mes riba su derecho di keda ketu.
Ta konsiderá Nini tambe komo e persona ku a buska hende pa likidá Helmin Wiels i na su turno el a buska Pretu. Nini lo t’esun kuahañasèniaduna Pretu e sèn p’e pagonan di e trabou ku a tuma lugá.
Sinembargo tabatin rabiamentu den esnan ku a ehekutá e asesinato, pasobra finalmente no a paga e suma kompleto na nan.
Un rekuento di e kaso: Na momentu ku e investigashon a inisiá 5 mei 2013 dia di e asesinato, no a dura mashá ku 15 di yüni 2013 a detené Pretu di 26 aña na Zoetermeer. Dos dia despues, esta 17 yüni 2013, Pretu ta yega Kòrsou abordo di KLM. Mesora ta pasa den su periodo di detenshon.
Su defensor mr. Vaders sigur na algun okashon a hasi petishon pa por a suspendé detenshon di Pretu, pero esaki ta keda rechasá manera dia 23 yüli 2013, 6 ougùstùs 2013.
For di yegada di Pretu el a keda será na Kazèrne na Suffisant bou di régimen pisá di militarnan pafó i tambe paden.
Den komienso di sèptèmber 2013 Pretu komo sospechoso den e kaso no tabata kier a keda será mas den e kamber na kazèrne. E ta konsiderá ku su detenshon den kazèrne lo tabata algu inhumano. P’esei riba su insistensia a traslad’é pa e sèlnan na warda di polis Barber. Pero no a dura muchu ku a bin haña Pretu kologá den su sèl na Barber, dia 6 sèptèmber 2013, 23:15. Dia 13 sèptèmber 2013 a baha e kaso di Pretu for di “ròl” di korte.
E kaso Magnus ta enserá esnan ku a ehekutá e asesinato di Wiels. Maximus ta enserá esnan ku a risibí sèn serka e intelektualnan i e intelektualnan mes, pa asesinato di Wiels.
Den luna di ougùstùs próksimo, Nini mester presentá pa kaso Maximus den sala di korte.
Bron: Extra