Informashon ku EXTRA ta disponé, ta indiká ku un polis di inisial R.M. ku ta karga e funshon di inspektor i lider di e tim U.S.T i ku tabata lider di e tim D.S.T den pasado, mester a presentá na e ofisina ariba menshoná i a pidi pa e keda atendé pa un empleado en partikular. Esaki pa reklamá beslag ku el a haña riba su salario relashoná ku plaka di alimentashon.

Di un fuente verídiko EXTRA a haña informashon ku djaluna lo yega un di 3 beslag riba salario di polis pa mesun motibu.

Dado momentu mester a surgi un interkambio di palabra kaminda e polis di inisial R.M. lo mester a lanta for di su stul i a kue e dama empleado tene na su garganta pa despues sera e porta i indiká na e dama ku e no por bai sin ku nan kaba di atendé e asuntu. Tin rumor fuerte ku asta e agente polisial a saka su arma reglamentario.

E polis a indiká ku Voogdijraad tin ya algun tempu ta kita otro montante for di loke wes a stipulá.

Esaki a pone ku e polis su kana a yena mirando ku el a reklamá e situashon vários biaha.

Demas empleadonan ku a tuma nota di e situashon a drenta den e ofisina pa yuda e dama.

E dama empleado a keda hopi troumatisá atras pa kual mester a asta pidi presensia di personal di Slachtoffershulp na e sitio.

Bron: Extra