WILLEMSTAD. – Manera ta konosí ayera Korte di Apelashon a duna UTS rason den e kaso ku Kontrolaria General a entamá kontra nan p’asina nan haña akseso pa drenta den UTS i kontrolá bukinan.

Korte di Apelashon ta di opinion ku e tarea legal di Kontrolaria General (KG) ta limitá na investigá prosesonan di Pais i su órganonan. UTS i su kompanianan afiliá no por ser konsiderá komo parti di Pais i su órganonan. Konsekuentemente investigashon di parti di KG no tin base legal

Abogado Hubert Braam ta di opinion ku e veredikto aki ta provoká Parlamento  kambia lei i duna Kontrolaria General mas outoridat, esta un outoridat ku e tin kaba, pero pa algun aspekto di lei no ta hasi posibel pa drenta den NV nan di gobièrnu.

Braam ta kere ku Parlamento tabatin un deseo i a pasa un moshon den Parlamento pa hasi un ouditorio den UTS. E moshon tei, ke men awor ta ora pa kambia lei i e no por kere ku esei lo no bai tuma lugá.

No por ta posibel ku un kompania di pueblo no por keda kontrolá, si awor aki esei no por, anto mester regl’é pa medio di lei pa esei tuma lugá mas pronto posibel, Braam ta di opinion.

Mester wak e asuntu aki den un bista mas di interes general.

E veredikto ta duna algun espasio pa tòg realisá kontrol i wak e bukinan, pero mester hasi petishon spesífiko kiko ke kontrolá. Esaki ta hasi e kaminda mas largu, pero si ta e kaminda ei mester kana awor aki lo mester kana e kaminda ei.

Pero e pregunta ku hopi hende ta hasi ta, dikon UTS ta bringa asina duru pa tene kontrolaria general for di su atministrashon, miéntras otro NV nan nunka no hasi difísil.

E pregunta ta, ku e gobièrnu aktual lo duna òrdu pa un ouditorio den UTS i alabes stimulá parlamento pa hasi kambio di lei.

Pa motibu di e kambio di lei aki no ta pa solamente UTS, pero tambe e otro NV nan di gobièrnu.

Bron: Extra