WILLEMSTAD.- Ornelio “Kid”Martina ta kandidato di Partido Nashonal di Pueblo pa okupá e puesto di Minister di Hustisia. E ta e úniko kandidato ku a sobra despues ku konseho di partido a evaluá un ke otro.

Pendiente di finalisashon di ‘screening’, Kid Martina lo ta nos próksimo titular di Hustisia i EXTRA a haña konfirmashon di esei. E dianan aki ku ta preparando pa formashon di un gobièrnu nobo tin nòmbernan di hende pa bai okupá puestonan ministerial ta ser menshoná. Manera ta konosí, Partido Nashonal di Pueblo lo bai asumí e karteranan di Desaroyo Ekonómiko i tambe Hustisia.

Den e fin di siman ku a pasa EXTRA por a komprondé ku e lider polítiko sr. Humphrey Davelaar mes tin intenshon di bai asumí e funshon di Minister di Tráfiko, Komunikashon i Planifikashon Urbano (VVRP) enbes di sra. Suzy Camelia-Römer ku a bin ta hasi un bon trabou i ku ta un dje faktornan prinsipal dikon PNP a haña un di dos asiento. Por sierto, komo resultado di su trabou Camelia-Römer a risibí muchu mas tantu voto ku e propio lider polítiko.

Pa loke ta e kartera di Hustisia, tabatin nòmber di tres persona a ser menshoná ku insistensia. Den promé instante menshon a ser hasi di sr. Richenel Meulens. Meulens ta un prominente dirigente di Partido Nashonal di Pueblo i tambe eks inspektor di polis.

Pero banda di sr. Meulens menshon a ser hasi tambe di sr. Rudsel Martina, ku tambe ta un alto inspektor ku den pasado a asumí e puesto di komisario di polis interino na momentu ku a suspendé hefe di polis, sr. Marlon Wernet. Pero Martina tambe tabatin su problemanan di karakter personal familiar di atendé. E di tres nòmber ku ta ser menshoná pa e puesto di Minister di Hustisia tabata mr. “Kid” Martina. Kid Martina no tin mester di introdukshon, ya ku e ta un abogado konosí den komunidat. Martina na diferente okashon a okupá puestonan den komisariado di kompanianan di gobièrnu na nòmber di PNP.

Bron: Extra