WILLEMSTAD.- Ministerio Públiko a apelá e kastigu di libertat di kulpa ku a kai kontra di dòkter siruhano-ortopediko Paul de Windt djárason último. Ministerio públiko no ta di akuerdo ku wes a apsolvé e dòkter di kulpa di maltrato di dos agente polisial.

E akusashon kontra di de Windt ta ku 29 novèmber 2014 el a dal e agente polisial. Aparte di a dal e agente ku moketa, el a dal e agente polisial ku su pia falsu na garganta i wowo robes dor di kual e agente a sinti doló.

E di dos akusashon ta menasa di e dos agentenan. El a insultá e dos agentenan polisial su mama mahos. Despues el a bisa nan: “mi ta kibra bosnan garganta anto mi ta pega bosnan kabes bèk dilanti patras. Mi a dal bo na bo garganta pasobra mi kier a kibr’é. Ta ami ta e úniko siruhano ku por drecha bo garganta bèk. Mi a dal bo garganta, pasobra mi kier a kibr’é. Dia bo kibra bo garganta ami ta e úniko siruhano ku mester operá bo. Lo mi pone bo kabeinan na bo pechu i bo kara na bo lomba”.

Fiskal a demandá 6 luna di kual 3 luna kondishonal ku guia Reclassering pa tratamentu di su problema ku alkohòl. Fiskal a haña probá ku e dòkter a maltratá sigur un dje agente nan polisial dor di dal esaki tres biaha ku skòp. Un dje skòpnan el a dal e agente den su kara kibra brel i tambe leshoná su wowo.

Sinembargo wes ta haña ku e denunsia dje agentenan kontra di dòkter no tabata sufisientemente supstansiá ku prueba. Wes a bisa ku ta dos deklarashon tin dje polisnan i e akusado. Lei ta pone prosèsverbal di polis na “haltu’. Pero den e kaso aki, e dokumentashon no ta keda sostené pa prueba konvisente. Ademas deklarashon di e dos agentenan polisial ku a atendé ku dòkter ta diferensiá di otro.

E karta di doktor di e agente polisial ku e akusado a heridá den kara segun wes, no ta sufisiente ku e akusado a dal e dòkter den kara. Ademas wes a konsiderá ku e tres agentenan “yòn” ku a atendé ku e akusado ku ta desabilitá, no por a laga e akusado maltratá nan. Wes ta pone duda na loke a pasa. E duda ta bin na fabor dje akusado i p’esei wes ta apsolvé dr. Paul di tur akusashon. Pues e sentensia aki Ministerio Públiko ta bai kontra di dje.

Bron: Extra