WILLEMSTAD.- Kompanianan di Gobièrnu a skapa esaki su kara, sino presupuesto di Gobièrnu di 2016 lo a sera ku un défisit di 30.8 mion florin.

E loke NV-nan a kontribuí kuné na presupuesto tabata di 56 mion florin, loke a pone ku un situashon di défisit di 32.5 mion ta kambia den un saldo positivo di 23.5 mion. Asina por a komprondé for di deklarashon di Minister di Finansa, sr. Kenneth Gijsbertha, ayera tardi den un enkuentro ku prensa.

E mandatario a splika ku originalmente e pronóstiko tabata ku Gobièrnu lo a sera su kuenta anual ku un surplus di 5.5 mion florin. Pero na último momentu el a hañ’é konfrontá ku un kantidat di faktura no-registrá, pues fakturanan sin “bestelbon” ku a kambia e panorama positivo pa unu negativo di -30.8 mion. Departamento di Finansa no tabatin ni por tabatin kòntròl riba e situashon di fakturanan no-registrá.

Sinembargo riba konseho di e Kolegio pa Supervishon Finansiero (CFT) gobièrnu a hasi sierto ehersisionan manera entre otro wak kiko NV-nan di gobièrnu tin na pago di dividendo. E ehersisionan aki a bin generá un total di 56 mion florin, loke a hasi ku e panorama a kambia bek pa unu positivo di 23.5 mion. A trata di dividendonan ku a bai bek te asta aña 2013 ku no a ser paga na gobièrnu. E kompanianan ku a komprometé nan mes pa paga dividendo tabata Curoil 7 mion, Curinde 1 mion, UTS, Gaming Conrol Board 2.5 mion, i UTS 44 mion. Segun Gijsbertha, e 23.5 mion di surplus aki lo keda reservá pa kompensá gastunan imprevisto ku lo por surgi.

Pero na opinion di e Gobièrnu aktual, lo tin di bai pone hopi énfasis riba e aspekto di disiplina presupuestario, loke ta nifiká ku lo bai enforsá kòntròlnan di un manera stringente den tur ministerio riba ehekushon di presupuesto. Tur esnan ku ta traha den e aparato aki mester komprondé ku no por komprometé Gobièrnu sin e outorisashon nesesario, pues no por duna lus bèrdè pa kumpra sierto servisionan sin ku tin un ‘bestelbon’. I si hasi esaki tòg sin un bon, e lo mester para responsabel i ku e persona ei sa ku lo por tin konsekuensia. Pero Gobièrnu lo bai manda un karta pa tur suplidor ku ta bende material i/òf servisio informando esakinan ku nan lo ser paga si nan entrega material òf duna un servisio sin ku tin un ‘bestelbon’ outorisá di Gobièrnu.

Segun Gijsbertha, den e kaso aki mester papia palabra kla sino kada bes di nobo lo surgi e fenómeno di fakturanan no-registrá, pues sin ‘belstelbon’.

Bron: Extra