WILLEMSTAD,- Nuebe parlamentarionan ayera a manda un karta na presidente di Parlamento tokante reunion di awe. Nan ta pidi presidente pa posponé reunion di awe, pasobra nan tin duda serio si e shete miembro ku a keda huramentá dor di gobernador dia 4 di yanüari ta legal den Parlamento.

Manera ta konosí for di 2’or di atardi ta plania pa Parlamento ta reuní awe  tokante e siguiente tópikonan: Retiru di Presidente di Parlamento i eskoho di un Presidente i Visepresidente di Parlamento. I tambe deliberashon ku Gobièrnu enkuanto e akuerdo di gobernashon 2016-2020 “Dignidat humano ta sentral”. E mesun 9 parlamentarionan (na nòmber di MFK Gerrit Schotte, Gilmar ‘Pik’ Pisas, Jacinta Constancia i Charetti Eduarda-Fransisca; na nòmber di Kòrsou di Nos Tur Amparo dos Santos, Norberto Ribiero i Meindert ‘Menki’ Rojer; lider di Movementu Progresivo Marilyn Moses i parlamentario independiente Eduard Braam) a manda un karta dia 24 di desèmber na presidente di Parlamento Humphrey Davelaar pa un reunion urgente ku minister-presidente Koeiman.

Den e karta di ayera nan ta splika  ku e proseso di investigashon di kredensialnan di e parlamentarionan nobo, no a kana segun regla, pasobra e nuebe parlamentarionan no a partisipá den un investigashon di kredensialnan i tampoko no a kontribuí na niun deliberashon. Segun e karta na e momentu di e reunion (dia 4 di yanüari) e nuebe parlamentarionan a forma mayoria di Parlamentario. Echo ku nan no a partisipá na ningun investigashon ni kontribuí na ningun deliberashon ta nifiká ku no tin desishon legal pa laga e 7 parlamentarionan nobo drenta. Asina ta skirbi den e karta. Nan ta sugirí  presidente pa gobièrnu ta aserká Raad van Advies pa investigá e situashon. Den e karta ta skirbi ku e nuebe parlamentarionan ta warda riba kontesta di presidente. Te na e momentu ei nan ta tuma e desishon pa partisipá den reunionnan públiko den deliberashon.

Bron: Extra