WILLEMSTAD.- ‘Kada bia ora nos ta mira kandela i huma saliendo for di chimeneanan di refineria nos ta sinti doló den nos kurason. Nos ta sinti e doló di Kòrsou.”

Asina presidente interino di Gunadong Zhenrong Lrd. (GZE) Yiao Lu a splika ayera den sala di parlamento despues di un presentashon di e kompania i komo kontesta riba pregunta di parlamentarionan tokante polushon.

Lu a splika ku China a akordá su mes na akuerdonan di Paris pa baha polushon mundialmente. ‘Nos ta un pais responsabel”, Lu a enfatisá. ‘Ora nos ta kuminsá ku e proyekto na Kòrsou nos lo sigui ku tur reglanan riba e tereno ei. Nos a komprendé ku gobièrnu di Kòrsou ta trahando pa standardnan pa baha polushon di medio ambiente. Nos ta duna nos garantia ku nos lo sigui ku esaki.”

Lu: ‘Nos lo baha kantidat di polushon. Spesialmente pa e muchanan ku ta biba serka e refineria. Nos tin nan salú den nos kurason. Nos no ke tende mas ku hende ta lanta den mainta pa kontrolá direkshon di bientu. P’asina nan sa ku nan lo tin molèster di e refineria si òf no. Hende na Kòrsou mester biba den trankilidat i sin molèster i sin preokupashon di e direkshon di bientu.”

Ku esaki GZE ta spera ku nan lo haña koperashon di PdVSA pa traha huntu mas lihé ku ta posibel. Lu a splika ku mitar di otro aña por kuminsá traha ku LNG den e refineria i stòp ku zeta den e refineria. ‘Esaki lo baha polushon drástikamente Tur kos ta dependé di bon koperashon. Tur hende responsabel na Kòrsou mester traha huntu.”

Lu tambe a splika ku GZE ta un kompania ku semper a pone hopi atenshon na e tópiko di responsabilidat sosial. ‘Den tur e paisnan ku nos ta aktivo nos ta duna feedback na komunidat. Nos no ta tuma tur ganashi bèk na China, Nos a obligá nos mes pa duna un porsentahe di nos ganashi na proyektonan sosial i trabou sosial.” Pa esei GZE den koperashon ku gobièrnu di Kòrsou lo instalá un fundashonnan pa yuda proyektonan sosial, Lu a splika.

Bron: Extra