WILLEMSTAD.- E negosiashonnan ku Guangdong Zhenrong ta avansando, i a logra diferente punto di importansia den e addendum ku ta den diskushon. Pa fin di luna awor, kuminsamentu di sèptèmber ta spera un akuerdo.

Promé minister Eugène Rhuggenaath a konfirmá ayera ku ta diskutiendo e detayenan. Pa algun di e puntonan den e addendum hasta a establesé fechanan konkreto, asina e mandatario a bisa. El a konfirmá tambe ku pronto e lo hasi un bishita na China pa wak e situashon di serka. E negosiashonnan ku Guangdong Zhenrong ta kai bou di responsabilidat direkto di e Minister-presidente.

EXTRA a informá ku durante e último bishita algun siman ariba e deliberashonnan tabata un poko “stroef” a rais di e kambionan den e kombenionan ku a firma ku e gabinete nobo ku a sinta na mei último a rekerí. Ta trata di kambionan den e Heads of Agreement ku a firma despues di e Memorandum of Understanding.

E delegashon chines den promé instansia no tabata masha di akuerdo ku e kambionan, prinsipalmente pasobra nan lo trese tardansa den e proyekto. Pero e koalishon nobo, prinsipalmente partido PAR, a konsiderá den konsulta ku ekspertonan ku tin diferente parti di e akuerdonan ku no ta duna Kòrsou sufisiente garantia. Ku otro palabra, nan por hinka Kòrsou den problemanan serio si no spesifiká nan mas konkretamente.

Ta a base di esei a sugerí e kambionan ku lo pone den un dokumentu ofishal ku yama “addendum” komo parti di e akuerdo total. Promé minister Rhuggenaath a bisa ku un representante di Guangdong Zhenrong tabata na Kòrsou pa papia riba diferente di e aspektonan di kambionan sugerí for di siman pasá. A papia tambe riba un bishita pa China.

” Nos lo bai reuní ku representantenan di gobièrnu na Guanzhou i lo papia riba puntonan komun di ekonomia. Hopi di e komershantenan chines ku ta aki ta for di e área ei. E deliberashonnan lo sigui e siman aki pa asina wak si por yega na un akuerdo rápido. Pa fin di luna/kuminsamentu di sèptèmber e lider di e delegashon Binyang Chen lo ta na Kòrsou pa firma e addendum”, asina e promé minister a bisa.

EXTRA a konstatá ku despues ku algun eksperto a atvertí pa no bai den aventura sin mas ku e grupo chines i tuma na konsiderashon tambe loke a pasa na algun parti di mundu, manera na Sri Lanka, gobièrnu ta un poko mas kouteloso ku e proyekto. Resientemente e ekonomista Alex Rosaria tabata un di esnan ku a atvertí indikando ku “e chinesnan lo no bin Kòrsou pa nos kara bunita. Mester wak e asuntu aki masha bon”, segun Rosaria a bisa.

Bron: Extra