WILLEMSTAD. – Outoridatnan dominikano ketu bai buskando dos kurasoleño sospechá di a kometé dòbel asesinato na Repúblika Dominikana dia 19 di yüni último.

E dos kurasoleñonan ku outoridatnan dominikano no a divulgá nan nòmber, a yega Repúblika Dominikano dos dia promé ku nan a kometé e asesinato. E dia ei nan a likidá dos hòmber ulandes.

Nan a kometé nan krímen riba un plantamentu di kaña i hopi palma na Seibo.
E dos kurasoleñonan aki a keda señalá ku e dos ulandesnan na La Romana.Nan ta kometé nan krímen dia 19 di yüni i dia 20 di yüni nan ta bandoná Repúblika Dominikano via aeropuerto. E momentu ku nan a baha bai, ainda outoridatnan no tabata sa di e dos mortonan. Nan a sali via aeropuerto Las Americas.

E víktimanan Rachid Benbouker (34) i Cuma Ceviz (36) a keda atras bentá den e plantamentu.

E likidashon aki tin di aber ku trafikashon di droga, asina e outoridatnan dominikano a duna di konosé.

Mester indiká ku tabatin dos aresto di kua un di nan outoridatnan a pone den libertat, pero e spañó Erik Montilla si a keda detené. Tin indikashon ku Erik tabata huntu ku e ulandesnan i e kurasoleñonan.

Manera menshoná, e likidashon tin di aber ku trafikashon di droga, kaminda ku dos kargamentu lo a pèrdè, un na Juan Dolio i e otro na El Oasis, ku ta keda pegá ku Hato Mayor.

E otro hòmber detené ta un trahadó di e vila kaminda ku e dos ulandesnan tabata keda, pero e hòmber aki a keda poné den libertat.
E spañó detené’ ta enkarselá den un sekshon di seguridat haltu p’asina garantisá su seguridat di bida.

E investigashon ta kontinuá den ful swing.

Bron: Extra