WILLEMSTAD.- Ayera durante e huisio sumario ku Sra. Magrit De Freitas direktora di SSC, huntu ku su abogado mr. Nagelmakers a entamá kontra e instituto, e abogado a bisa ku por ta posibel ku e motibu ku a suspendé e dos miembronan di hunta di komisario pa pone dos otro, por tin di aber ku e korespondensia entre Minister ku De Freitas, tokante e retiro di trabou di un empleada na yüni 2017.

Segun e abogado, dia 5 di òktober 2015 un trahadó di SSC, a keda poné riba non aktivo. Esaki despues di un lucha hurídiko largu, a terminá e kontrato di e empleado aki. Segun e abogado, a terminá e kontrato den konsulta i ku aprobashon di hunta di komisario. E abogado a sigui bisa mas aleu ku su kliente Sra. De Freitas huntu ku hunta di komisario, a yega na e retiro di e dama despues di un konseho hurídiko. Segun mr. Nagelmakers, den e karta a bai e korespondensia entre e Minister i Sra. De Freitas tokante e retiro di e trahadó.

E abogado a duna di konos’é ku e ke mustra hues, ku e korespondensia aki por ta e motibu di e suspenshon di e dos miembronan di hunta di komisario. Segun e abogado e dos miembro nobo nan, a pone De Freitas riba non aktivo i awor ta buskando un motibu pa suspendé e direktora for di su funshon i òf un posibel retiro. E abogado a duna di konosé ku for di yanüari 2016, vários karta anónimo a kuminsá skeiru den media, ku De Freitas ta keda akusá pa mal maneho.

Segun e abogado diferente karta anónimo a keda mandá den media i tambe pa miembronan di Staten. Riba esaki De Freitas a laga hasi un investigashon dor di servisionan Forensiko, di kual a sali afó ku e mail adrès ku ta keda uzá pa manda e mailnan anónimo, ta bin for di Inhustisia.com. E abogado a splika ku tambe a sali afó ku e mail nan ta keda habrí, den un bibienda di dos empleado di SSC i tambe den bibienda di un empleada ku a keda retirá for di trabou. Segun e abogado for di netamente e adrès di mail aki, e karta ku Minister a manda pa De Freitas dia 22 di yüni a keda mandá pa prensa.

Mr. Nagelmakers ta di opinion ku despues di elekshon di dia 28 di aprel último, a bin dilanti den prensa ku Minister Wallé a keda aserká pa un empleada, ku a bisa ku tin intimidashon di personal den e Fundashon. E abogado a bisa ku dia 22 di yüni e karta di e Minister na SSC en konekshon ku e retiro di e empleado, a keda manda pa prensa via Inhustisia.com di kual nòmber di e trahadó a keda publiká den vários korant.

Bron: Extra

Direktora di SSC a keda suspendé sin motibu válido

WILLEMSTAD.- Ayera abogado mr. Barbara Nagelmakers a hiba defensa pa Sra. Magrit De Freitas, miéntras abogado mr. Achim Henriquez a representá SSC (Stichting Studie Financiering) den un huisio sumario.

Esaki despues ku Sra. De Freitas direktor statutario di e fundashon, a keda suspendé for di su funshon pa hunta di komisario dia 13 di yüli último.

E motibu di e huisio sumario tabata pa hues anulá e suspenshon i asina Sra. De Freitas regresá bèk na su puesto. Tambe e abogado a bisa ku su kliente no a haña ni chèns di defendé su mes. Segun e abogado di e direktora, su kliente a keda suspendé inhustamente i sin niun motibu konkreto, pa supuesto kosnan robes ku ta bisa ku su kliente a hasi den e instituto. El a duna di konosé ku den e karta ku su kliente a risibí, e no a mira niun motibu válido pa su suspenshon.

E dia di e suspenshon dos miembro di e hunta komisario nobo ku e gobièrnu aktual a nombra, a aserká de Freitas kompañá pa un abogado, di kua nan a entreg’é un karta i inform’é di su suspenshon. E mester a entregá tantu su telefòn selular komo su kòmpiuter. Segun e abogado su kliente a keda prohibí pa subi tereno di e Fundashon i tambe prohibí di tin kontakto ku e trahadónan. E empleadonan tambe a keda prohibí di tin niun tipo di kontakto ku e direktora.

Segun e abogado e personal tin miedu ku su kliente no a haña ni su slep di salario ku el a pidi. Den e términonan general ta referí na e korespondensia entre minister i De Freitas i korespondensia entre minister i hunta di komisario. Dor di esaki a surgi un situashon hopi tenso di kual hunta di komisario a haña e suspenshon na su lugá. E abogado a bisa ku den media, miembro di hunta di komisario a bisa ku lo no ekskluí e posibilidat ku e direktor lo wòrdu retirá for di trabou. Tambe e abogado a bisa mas aleu ku dia 17 di yüli último hunta di komisario a manda un karta pa De Freitas, bisando e ku el lo keda skuchá dia 28 di yüli i dia 24 di yüli lo e por a haña un bista den e dokumentonan e motibu di su suspenshon.

Segun e abogado, den e karta tabatin pará ku e motibu di e suspenshon ta pa entre otro ku De Freitas lo a saka demasiado sèn for di e instituto, kontratonan ku a keda hasí ku tersera, di kual esaki no tabata demasiado kla ki interes i balides nan por tabatin pa e Fundashon. E direktor no a sigui e prosedura di statuto òf leinan ku ta keda hasí pa sierto manehonan i tambe ku De Freitas no a manehá e atministrashon manera mester ta.

Segun e abogado e echonan den e karta no ta konkreto formulá pa suspenshon di su kliente, pero e motibunan ku nan ta trese ta diferensiá. E abogado a bisa ku den e dokumentonan tabatin un karta ku a duna di konosé, ku De Freitas a wòrdu suspendé anteriormente pa un situashon di emergensia. Segun e abogado su kliente nunka a haña e karta aki. Den a karta nan a papia di e mesun kuater puntonan di e karta di 17 di yüli.

E abogado a bisa ku su kliente a papia 5 ora largu ku hunta di komisario kaminda preguntanan a keda hasí pa esun outorisá pa hunta di komisario mes. Segun e abogado e miembronan nobo di komisario ta akusá De Freitas di basta kos ku nan mes a bai di akuerdo kuné òf a tuma desishon riba dje. E akusashonnan aki no por ta motibu di su suspenshon segun e abogado.

Bron: Extra

Multa di 5 mil florin pa kada dia ku SSC no kumpli

WILLEMSTAD.- Abogado mr. Nagelmakers ku ta esun ku a representá direktor di SSC Sra. Magrit De Freitas, ayera den huisio sumario, a bisa hues ku despues di e veredikto e ta eksigí SSC pa den 24 ora e direktor por bai bèk su trabou.

Tambe e ta eksigí pa su kliente haña su telefòn bèk ku “abonement” mirando ku e tin derechi riba esaki. Segun e abogado, e ta eksigí tambe un multa di 5 mil florin pa dia òf un parti di e dia, pa kada bes ku SSC faya ku e akuerdo den e veredikto. E abogado a pidi tambe pa SSC paga su kliente e suma di 5 mil florin huntu ku e interes, ku for di e promé dia di e petishon.

Tambe e abogado a pidi hues pa anulá e loke SSC a imponé. E abogado ta di opinion ku su kliente nunka no a divulgá sekreto di trabou den publisidat manera e ta keda akusá di dje. El a bisa ku e suspenshon di De Freitas a trese henter un tenshon, angustia i miedu den e fundashon i tambe divishon den e empleadonan. Tambe el a papia di e relato anual ku ta akusá su kliente di dje ku ainda gobièrnu no a risibí. Segun e abogado, esaki ta kla kaba i solamente falta algun kos pa kaba di wòrdu kontrolá. Segun e abogado, a base di e derechinan humano su kliente no mag di keda suspendé.

Abogado a duna di konosé ku no a tene kuenta ku e interesnan di su kliente. El a bisa ku su kliente tin interesnan di urgensia pa regresá bèk su trabou, komo direktor i tambe ku e mester haña su telefòn bèk mirando ku e tin vários dato personal den esaki. Tambe e abogado a duna di konosé ku su kliente semper a traha kontentu i no a hasi nada robes den SSC ku no por mira lus di dia. Hues de Kort na final a duna di konosé ku e lo bai analisá e kaso i ta tuma desishon dia 23 di ougùstùs próksimo.

Bron: Extra