WILLEMSTAD. – Resientemente korte di Rotterdam a duna un veredikto temporal (registrá bou di e number ECLI:NL:RBROT:2017:917) den un disputa hudisial mionario ku a hala atenshon.
Un komershante alabes direktor di un kompania grandi, a hiba kontra di su ofisina di akountent Loeff Claeys Verbeke i Loyens & Loeff i un fundashon i dos otro instansia (Loeff c.s.). Ta trata di un disputa ku ta kore den 20 pa 25 mion euro, ku ta belasting riba un suma di mas o ménos 182 mion euro.
Ta trata di un disputa hudisial ku a kuminsá lora for di den aña 2012. Ta trata di e doño i direktor di e fábrika Farm Frites. E direktor aki ta akusá su konseheronan finansiero di a faya den konseho loke ku a perhudik’é pa vários mion euro. Riba konseho di su konseheronan, e direktor a bin biba na Kòrsou ku su kasá pa un aña i asina el a kere ku e lo por skapa belasting. Pero den realidat esei a resultá, tumando na konsiderashon ku ofisina di belasting a dal e direktor aki un belasting entre di 20 pa 25 mion euro.
E direktor aki a hasi tur manera pa yega na un dil ku belasting pa e paga ménos, manera 10 pa 12.5 mion euro. Pero ofisina di belasting ta tèrko i a keda para riba nan punto. E direktor di e kompania aki a bin ku vários punto dilanti, dikon e no por paga e suma di plaka en kuestion na belasting.
El a hasi menshon di entre otro, regalo na su yunan di hopi plaka i tambe ta konsiderá e echo ku el a biba na Kòrsou, e ta kai bou di un otro areglo di belasting, pero niun di e puntonan ariba menshoná no a haña oido. Ofisina di belasting ta di opinion ku e no por bisa ku e direktor a muda pa Kòrsou, pa motibu ku el a keda inskribí den registro sivil na Ulanda, el a keda direktor di e fábrika, el a keda miembro di tur e klupnan ku e ta frekuentá i a keda ku su mesun dòkter di kas.
E direktor tabata ke a yega na un dil di pago di ménos di 12.5 mion euro, pero no ta kedando kla ku esaki. Pa trese mas aklarashon, e tribunal di tres hues a indiká ku nan ta wanta e kaso pa tende algun testigu mas i tambe, buska mas informashon pa nan por yega na un desishon den e kaso aki. E disputa ta kontinuá dia 22 di mart di e aña aki.
Bron: Extra
Naschrift KKC
Klik hier voor de volledige uitspraak