WILLEMSTAD.- Den e kuenta anual di 2016 di ministerio públiko ta papia dje kantidat di kasonan penal di hóben ku a ser atendé.

Den kuadro di e plan hudisial pa hóben (sèptèmber 2010), den 2016 a traha intensamente ku Stichting Ambulante Justiele Jeugdzorg Curaçao (AJJC). Den 2016 e kantidat di kasonan penal di hóben registrá na Ministerio Públiko tabata 62, i ta trata di muchanan di 12 pa 17 aña. Den un total di 42 di e kasonan e muchanan a keda enkarselá. Alrededor di 70% di kasonan ku a drenta serka Ministerio Públiko a keda atendé. E sobra di kasonan di 2016 lo terminá den 2017.

Hopi di e hóbennan ku a keda detené a keda manda pa AJJC pa supervishon òf nan ta ser pone bou di Reclassering.

Otro kasonan ta esnan di Hato, kaminda ta gara hende ku droga. Durante di 2016, 185 kaso a keda atendé dor di Ministerio Públiko. Ta trata di tur e hendenan ku a keda detené na aeropuerto Hato ku droga den nan posishon, pero tambe esnan ku a manda pòst pakete ku droga i personanan na Kòrsou ku a keda detené ku un kantidat di droga den nan poseshon òf ta bende droga.

E rutanan mas usa pa transporte di droga ta Ulanda, Alemania i Canada.
E droga hopi biaha ta skondí den maleta, hende ta guli bolita, di plak na nan kurpa, òf laba den paña pa un total di 109 kaso.

Den luna di novèmber tabatin detenshonnan ku hopi kantidat di droga, di kual 3 persona ku konhuntamente tabatin 8 kilo di koka, i dos otro persona ku tabatin respektivamente 10.2 i 11 kilo.

Bron: Extra