WILLEMSTAD.- Parlamentario Charles Cooper a indiká ku nan frakshon di partido MFK a sigui minister Konket djaserka riba e tema ku el a bai pidi konseho na e Órgano di Konseho di Estado (RvA), riba kon mester interpretá e lei i akuerdonan (Convenantnan) entre gobièrnu i sindikatonan hasí den pasado.
MFK ta kere ku minister Konket mester kumpli ku palabrashonnan i kombenionan hasí den pasado ku e representantenan di trahadó di gobièrnu. Pasobra ya kaba ta sintiendo intrankilidat reinando na boka di trabou den gobernashon, i esaki lo no kumbiní pueblo di Kòrsou na e momentunan aki. Echo ta ku den pasado Gobièrnu a firma kombenionan ku e sindikatonan ku ta representá trahadónan di gobièrnu. Anto awor minister Konket kier hasi manera ku e kombenionan aki no tin valides.
Sr. Cooper a bisa di no ta spera ku e akshon ku minister Konket a bini kuné aworakí di pidi konseho na e Órgano di Konseho, ta un maniobra pa tarda kos i rèk kakiña. Esaki solamente lo sirbí pa tira gasolin riba e kandela. Na final di dia e akuerdonan den e Convenantnan mester kumpli ku nan. Si minister Konket no ta esun ku kier duna e kontesta, Minister Presidente Rhuggenaath òf Minister di Finansa Gijsbertha lo tin ku sali duna aklarashon. Nan no por skùif e kos for di nan, pa pidi nan entregá den pasado awor mester kumplí ku Gobièrnu su parti, di akuerdo ku sr. Cooper.
“MFK ta haña ku ta ridíkulo ku minister Konket a indiká den medionan di komunikashon ku lo laga ámtenarnan huramentá di nobo”. Segun LMA tur ámtenar mester huramentá ora nan kuminsá traha òf ora nan kambia di funshon. Mester wak e asuntu aki bon pa e ámtenarnan di por ehèmpel “Eilandgebied Curaçao”. Pasobra kasi tur, si no ta tur ámtenar di e tempu di “Eilandgebied Curaçao” a huramentá serka Gezaghebber e tempu ei kaba. I e prosèsverbalnan aki ta warda den archivonan di gobièrnu.
Sr. Cooper a sigui splika ku si na “Land Nederlandse Antillen” di e tempu ayá, e ámtenarnan no a huramentá, anto e ora ei minister Konket mester huramentá esunnan aki so. Pues, básikamente MFK ta sugirí sr. minister Konket, pa no bai gasta tempu balioso ku huramentashon di tur ámtenar. Sigur no e ámtenarnan ku a huramentá kaba den pasado. Mihó minister Konket usa su tempu pa sinta ku e sindikatonan den CGOA i kumpli ku lokual ku a Convenantnan firmá ta kontené, sr. Cooper a bisa.
Bron: Extra
MFK ta sugirí sr. minister Konket, pa no bai gasta tempu balioso ku huramentashon di tur ámtenar. MFK tin tur razon ta kwantu biaha Cooper ku Schotte a jega di huramenta? Ta kwantoe ambtenaar tin ta huramenta ku ta horta sen di pueblo of pasa droga?? Den sector priva no tin huramentoe ku excepcion di algun accountantskantoor bo no ta tende nunka di fraude. Laga nos legu mai e koi kens di huramentacion i stop di horta kos di pueblo Cooper.