OM NO TA BISA NADA RIBA INVESTIGASHON MAXIMUS
(met video’s Notisia360 onder, red)

WILLEMSTAD.- Miéntras ku rumornan a bolbe lanta kabes kaminda ta menshonando nòmber di parlamentario Elmer “Kadè” Wilsoe komo sospechoso den e kaso Maximus, ministerio públiko no ta bisa nada riba e investigashon aki. E investigashon Maximus ta trata e outornan intelektual tras di morto di e lider polítiko Helmin Wiels 5 di mei 2013.

Un bia mas tabatin informashon serka medionan riba Internet relashoná ku e kaso di Wiels. A lanta hinter e kaso di nobo i menshoná Kadè Wilsoe. EXTRA a tuma kontakto ku e parlamentario, pero el a bisa ku e no ta bai reakshoná i ta warda e momentu oportuno pa atendé ku tur esnan ku ta menshoná su nòmber.

Mirando seriedat di e kaso EXTRA a tuma kontakto ku fiskal Guiano Schoop kende a bisa ku OM ta mantené nan posishon ku no ta duna niun informashon riba e kaso Maximus.

Uniko kos ku e ta bisa ta ku e investigashon ta kanando. Riba e punto si Wilsoe ta sospechoso si òf no e fiskal a bisa ku e no ta bisa ku Wilsoe ta ni ku Wilsoe no ta sospechoso pasobra si e bisa ku e parlamentario ta sospechoso e lo ta dunando informashon anto si e bisa ku Wilsoe no ta sospechoso tambe e lo ta dunando informashon riba e kaso i esei nan no ta hasi.

E fiskal a sigui bisa ku tin hendenan ku OM a skucha komo testigu i otronan komo sospechoso. Esnan ku OM a duna informashon riba dje ta pa motibu ku nan a keda detené i p’esei a duna informashon na prensa.

OM no ta duna detaye riba e kaso. E investigashon ta kontinuá i OM ta purba yega na klaridat pa informá komunidat.

Bron: Extra

Video’s: Notisia360
Dossier: Helmin Wiels – Moord