WILLEMSTAD.- E nòmber di Francesco Corallo tabata menshoná atrobe den prensa na Italia despues ku a pidi pa detenshon di Gianfranco Fini Tulliani. E hòmber aki ta ruman di Giancarlo Fini Tulllani.

Giancarlo i Elizabeth Tulliani ta doñonan di e kompanianan offshore Printemps Ltd, Tim Ara Ltd i Jaydene Holding Ltd ku ta relashoná ku sumanan grandi di Corallo ku a pasa via di Italia, Ulanda, Antia Ulandes (!), Monaco i Sint Lucia.

Un wes investigador, segun e publikashonnan, a bai di akuerdo ku e petishon pa detenshon. Ofishalmente e ruman hòmber ta bibá na Dubai pero no por hañ’é ningun kaminda. E wes investigador a bisa ku  Gianfranco Fini Tulliani tabata bon na altura di e moveshonnan ku a tuma lugá i konsekuentemente e tambe ta direktamente responsabel pa aktonan iregular ku a tuma lugá den e kaso aki. E loke e grupo a “laba” na plaka via di sistemanan offshore, Francesco Corallo a usa den aktividatnan ekonómiko i finansiero i tambe ku atkisishon di propiedat inmueble.

E órden di detenshon kontra Gianfranco Fini Tulliani ta relashoná ku e investigashon ku a kuminsá dia 13 di desèmber den kua a detené Francesco Corallo, Rudolf Theodoor Anna Baetsen, Alessandro La Monica, Arturo Vespignani i Amedeo Labocetta. A detené Corallo na e parti ulandes di Sint Maarten i Baetsen, man drechi di Corallo na e parti franses. Corallo ta bringando su ekstradishon pa Italia den kuadro di e investigashon. Kuminsamentu di luna wes a ninga pa lag’é den libertat.

Segun e investigadornan nan ta lidernan i partisipantenan di un asosashon kriminal ku karakter transnashonal (krímen ku ta krusa frontera). Nan a hasi nan mes kulpabel na froude, labamentu di plaka i eskivashon di belasting. Dia 14 di febrüari último e Sentro di Investigashon di Finansa di Italia a konfiská propiedat na balor di 5 mion euro di Tulliani i otro personanan enbolbí den e kaso aki.

Bron: Extra