Definitivamente Pueblo Soberano no ta retirá gevmin

WILLEMSTAD.- Minister plenipotensiario pa Kòrsou Marvelyne Wiels no ta skit for di Kas di Kòrsou na Den Haag, Ulanda. Ni un milimeter. Awe atrobe minister Wiels a keda funshoná manera semper tabata e kustumber.

Su partido Pueblo Soberano (PS), no ta mira ningun motibu pa retirá e gevmin.

Esaki ta nifiká ku tur espektativa ku awe Kòrsou lo a lanta tende ku soberanistanan a bisa minister plenipotensiario pa keda kas djasabra último, a kai na awa. Anteriormente tabata reina e impreshon ku PS lo a retirá e minister, despues di a kore ku premier Ivar Asjes.

E rumornan a kue mas forsa, ora ku djasabra último a papia internamente ku miembronan soberanista i ku lo a disidí ku siguramente lo retirá e ruman muhé di defuntu lider Helmin Wiels, loke awor a resultá ku definitivamente no ta e kaso. “Mi no ta komprendé ni mira e motibu dikon mester retirá Marvelyne tampoko”, tabata reakshon di parlamentario Melvin Cijntje di PS, riba e pregunta di EXTRA kon ta pará ku status dje mandatario na tera friu. “No tin motibu pa kita e gevmin for di trabou”, el a agregá.

E representante di pueblo a bisa redakshon ku e no por komprendé e insistensia ku mester retirá Wiels. “Kisas m’a pèrdè algu durante e temporada ku mi tabata malu”, segun parlamentario Cijntje a referí na e temporada ku e tabata haña tratamentu médiko pa su enfermedat na Ulanda.

No opstante, e siman ku ta tras di lomba i sigur despues dje retiro abrupto di premier Ivar Asjes tambe di PS, e análisisnan tur kaminda den e mundu polítiko tabata indiká ku awor e soberanistanan lo prosedé ku mandamentu di gevmin Wiels kas.

E minister plenipotensiario ku den realidat ta un ámtenar komo ku e no ta na kabes di un ministerio, ta kai bou di e minister di asuntunan general ku den e kaso aki tabata èks premier Ivar Asjes i tabata konstantemente den notisia negativo pa un kantidat di kontroversia.

Te hasta un èks sindikalista a bai asina leu, di sigurá ku a manda

Asjes kas, pa por retirá Wiels tambe mas fásil. “Nos no mester a kita konfiansa for di Asjes pa ‘ontslag’ Marvelyne. Si PS tabata ke manda Marvelyne kas, lo a hasi esaki den ‘ministerraad’ i kla”, segun Cijntje a afirmá. Doño di kurpa mes a refutá rumornan ku lo e tabata na Kòrsou durante wikènt, manera sierto parlamentario i radio emisora entre otro lo a sugerí. “Mi no por ta na dos kaminda. Mi ta na Ulanda”, Wiels ta skirbi riba su Facebook pa kontradesí e redunan. “Stòp di ansha boso bida”, el a agregá, referiendo opviamente na esnan ku lo ta fomentando e notisia falsu ku ta den Willemstad. Un siudadano konosí hilárikamente ta bisa e gevmin ku “un selfie por yuda konfirmá i aklará” ku e ta na Ulanda i no Kòrsou.

Otro reakshon tabata “esta un ansha ku transha” i otro tabata bisa “ta ‘tovernaar’ nan kier sa ku bo ta Marvelyne Wiels”, meskos un otro skirbi ‘chill’ di bo laga otro nan sapatiá”. Tambe un amiga a bisa ku “wak bon pa nan no manda bo kas aki nan, logá ta aya bo ta”, ku no a kai den bon tera por asumí.

Bron: Extra