WILLEMSTAD.- Frakshon di Un Kòrsou Hustu lo ke koperá, i koperá den tur sentido di palabra pa Kòrsou bai dilanti. Un dia nos tur lo tin di bandoná e mundu aki, anto bo no ta bai ku nada, pero lo bo laga hopi kos atras.

Den kaso di InselAir lo por konta ku su frakshon pa koperashon. Asina sra. Omayra Leeflang a trese dilanti durante e reunion públiko di Parlamento pa trata e tópiko di InselAir.

Mas aleu el a deklará ku, mester ta masha kouteloso den e konstelashon aki pasobra si bo no ta bei nan ta pasa bo un ‘fastball’. Anto e ta bisa ku esaki mester ta un alerta pa koalishon. Segun Leeflang e reunion a ser yamá pa: Deliberashon ku Minister di Asuntunan Ekonómiko tokante e situashon finansiero i operashonal di InselAir i e intenshon di gobièrnu di Kòrsou pa inyektá fondonan públiko den un kompania privá”.

Segun Leeflang, e kuestion di inyekshon di fondo públiko ta algu ku mester ser barí fo’i mesa pasobra e no ta algu ku ta inkluí den e ‘landsbesluit’ ku ta papia di lantamentu di e komishon di sabionan. E ‘landsbesluit’ ta bisa ku e komishon tin komo tarea e.o. konsehá kon ta hasi mantené e konekshonnan aéreo ku ta krusial pa Kòrsou i interes general. No ta papia di inyekshon. Na di dos lugá ta papia di studia e posibilidat di un kompania aéreo robusto pa Kòrsou. Ta papia di hiba e trayekto aki den bon kaminda.

Pues no ta papia nada di hinkamentu di fondonan públiko den ningun kompania. Si tin kuestion di hinkamentu di fondonan públiko, e lo ta kontra sigur. Pasobra tin yen hende ku hamber ta kana eifó, anto por usa e fondonan ei pa parti pan den bario.

Mas aleu sra. Leeflang, kende semper ta lesa su dokumentonan bon, tabatin remarke riba e konsiderashonnan di e ‘landsbesluit’. Den e konsiderashonnan aki ta bisa ku InselAir lo a presentá un plan dia 19 di òktober 2016 ku tin di aber ku ‘doorstart’, pues un forma di kontinuashon di e kompania, i pa kual a pidi un kapital di parti di gobièrnu komo inyekshon den e kompania. For di momentu ta papia di ‘doorstart’ pasobra tin bankarota. Pues ta un kuestion di sera i habri e kompania bèk. I sin bankarota no tin ‘doorstart’.

E parlamentar io a eksigí pa haña klaridat riba e partikularidat aki. Si ta nos ta para aki, anto ta bon pa papia habrí i na serio. E frakshon aki no ta oposishon ni koalishon, sino ku e ta traha pa Kòrsou.

Bron: Extra