DEN HAAG.- E krakernan (okupadónan ilegal di un edifisio) di Kas di Kòrsou na Badhuisweg mester sali for di e edifisio pa mas tardá djamars. Asina korte na Den Haag a disidí djabièrnè último. E motivashon di korte ainda ta falta, esaki lo sigui djaluna awor.
Kraker Joram Trijsberg ta bisa ku e sentensia a dal e duru. El a bisa NTR Caribisch Netwerk: “Mi no sa a base di kiko a ninga nos petishonnan, esei ta hasi esaki difísil. Ta pasobra a bende e edifisio? Pero pakiko parlamento no a disidí esaki ainda anto? ”E krakernan ta kambia nan sintimentunan i ta kuminsá wak nan próksimo kaminda di biba numa. Nan lo respetá e sentensia, asina nan a bisa anteriormente.
Abogado Emil Tamas ku ta yuda e krakernan tambe ta desapuntá. E ta haña ku e krakernan no a haña un oportunidat honesto. “Bo por hiba un kaso sumario òf entregá un apelashon di urgensia, pero e ora ei bo mester di e motivashon di un wes si. Esei mi no tin awor. P’esei mi ta kontemplá di entregá un keho serka Korte Oropeo pa derecho Humano (KODH).”
Trijsburg lo aploudí e paso ei pa bai KODH, e ta bisa. “Kas di Kòrsou un dia delantá numa, 16.45 or, a entregá e kòntrakt di benta, nos abogado a hañ’é manisé mainta. Kon nos por a studia e dokumentonan pa defendé nos mes?”.
Segun e no tin un nesesidat real tampoko pa sali bai mesora, “Nos ta kuida e edifisionan bon, nos tin bon reputashon i rekomendashon. Por hasi bon palabrashon ku nos, pero nan no a trata ni mes. Ta lástima, esaki lo a spar hopi esfuerso.”
Bron: NTR/CaribischNetwerk