PHULIPSBURG.- Korte di apelashon djárason último a hisa kastigu p’e sospechosonan ku tabata envolví den kaso di atrako ku morto dje agente polisial Benjamin.
Tres siman pasa Abogado General mr. Jan Spaans a bolbe demandá kastigu di bida largu pa e asesino prinsipal dje agente polisial Gamali “Benji” Benjamin, ku a pèrdè su bida durante un kaso di atrako ougùstùs 2015. E kaso a haña e nòmber di “Menam”.
E siman aki Korte di apelashon na St. Maarten a sentensiá e hòmber R.D. konsiderá komo e sospechoso prinsipal den morto dje agente polisial Benjamin na 25 aña di prisòn.
R.D. (Sint Maarten, 1992), ta e sospechoso prinsipal den e kaso di atrako riba e joyería den Frontstreet Diamante Jewelry dia 5 ougùstùs 2015.
Dia 4 di mei 2016 korte di promé instansia a sentensiá R.D. na 20 aña di prisòn. Tres siman pasa Abogado general a pidi 30 aña di prisòn durante tratamentu di e kaso di apelashon.
R.D. a keda haña kulpabel di atrako armá, posishon ilegal di arma di kandela, i morto di e agente polisial Gamali Benjamin i intento di asesinato di kompañero di trabou di Benjamin, e agente polisial Carty.
E otro sospechoso J.L. (Sint Maarten, 1995) a keda sentensia na 15 aña di prisòn. El a keda haña kulpabel di komplisidat di atrako arma, asesinato, intento dia asesinato, poseshon ilegal di arma di kandela. J.L. den korte di promé instansia a keda kondená na 8 aña di prisòn.
E di tres akusado ku a keda apsolvé di tur akusashon den korte di promé instansia a risibí kastigu den korte di apelashon.
Ta trata dje akusado O.A.C. (Sint Maarten, 1981) ku korte di apelashon a haña ku e ta kómplise di e atrako ku konsekuensia di morto dje agente polisial. Korte di apelashon a kondená O.A.C. na 4 aña di prisòn.
E agente polisial Benji riba dicho dia tabata hasi patruya den sentro di St. Maarten riba su baiskel, ora ku a drenta melding di un robo ku tabata tumando lugá den e negoshi Oro Diamante den Frontstreet.
Na yegada di agente polisial el a keda konfrontá ku e malechornan ku tabata sali for di e negoshi e momentu ei. Nan a los disparo ku a alkansá e agente polisial den su kabes.
Den kondishon basta kritiko a transport’é pa hospital. Despues a transportá e agente Sto. Domingo pa un tratamentu médiko mas avansá. A pensa ku lo por a saka e bala for di den su kabes, pero no por a hasi nada mas p’e i a regresá kuné St. Maarten, unda el a bin fayesé.
E akusadonan tin dos siman di tempu pa bai korte di kasashon.
Bron: Extra