WILLEMSTAD.- E drama di Jamaicaweg ku a tuma lugá djaluna último dia 7 di ougùstùs a laga nos bai bèk den e kaso di likidashon ku a tuma lugá dia 18 di mart di e aña aki na Berg Altena. E kaso aki tambe tabata unu kruel, kaminda ku arma outomátiko a basha bala riba kuater hòmber pará na un snèk.
Ta parse ku tur hende a lubidá e kaso aki, kaminda e kuater hòmbernan Elery Zedelkia Harvey Aeneas Jair Cijntje nasé na Kòrsou 39, Harold Antonio Francisca nasé na Kòrsou 48 aña di edat, Purcival Delano Brooks nasé na Kòrsou 54 aña di edat , i Reegi Riedsel Arcangeles Angelista nasé na Kòrsou 32 aña di edat, tambe a keda seftá ku bala.
Den e kaso aki, a bisa ku hende inosente tambe a pèrdè nan bida, igual ku e drama di Jamaicaweg.
Na mart tambe a lanta un TGO Berg Altena (Team Grootschalig Onderzoek) ku a kuminsá ku investigashon. Outoridatnan a hasi yamada riba personanan ku tin mas grabashon di loke a pasa pa entregá esaki na polis. Pero tambe pa duna informashon. Sinembargo te awe a detené tres hende ku a hòrta e víktimanan di e likidashon aki.
Den luna di aprel a detené 3 persona pa ladronisia. Djis despues di e insidente, algun hende ku a presentá na e sitio pa mira un ke otro, a listra den saku dje víktimanan drumí abou sin ta duna señal di bida i hòrta nan pertenensianan. Te ainda no tabatin detenshon di posibel sospechosonan di e kaso aki ku tambe ta unu kruel.
Pa kasualidat ayera outoridatnan a hasi detenshon di un hòmber den Cocowijk i a indiká ku ta pa un kaso di asesinato di den pasado. Outoridatnan no ke a duna masha informashon dje detenshon aki.
Atrobe den kaso di Jamaicaweg a lanta un TGO Jamaicaweg ku awor lo ta reforsá ku mas polis pa investigashon. Ta bolbe hasi yamada na komunidat i en espesial esun di Buena Vista pa duna informashon pa investigashon por kana. Igualmente den tur otro kaso polis ta pidi informashon pa yuda solushoná e kantidat di kasonan di asesinato ku e aña aki a alkansá 21.
Bron: Extra
A lanta “Team Grootschalig Onderzoek Jamaicaweg
WILLEMSTAD.- Relashoná ku e kaso di asesinato ku a tuma lugá djaluna último den Buena Vista, lagando un saldo di 10 hende heridá ku konsekuensia fatal pa 5 di nan, ministerio públiko a duna e kaso un nòmber ofisial.
Ministerio Públiko a konfirmá pa EXTRA ku for di ayera e kaso ta karga e nòmber ofisial “Jamaicaweg”.
Aparte di esaki Bosero di Kuerpo Polisial di Kòrsou Sr. Reginald Huggins a konfirmá pa EXTRA ku KPC bou di liderazgo di OM a lanta un tim spesial ku ta karga e nòmber Team Grootschalig Onderzoek Jamaicaweg (TGO Jamaicaweg.
Tur esnan den e tim aki lo bai ta enkargá ku investigashonnan rondó di kaso “Jamaicaweg” ku e meta pa logra gara esun òf esnan responsabel di a kita bida di 5 hende hòmber.
E tim lo tin refuerso èkstra pa e investigashon aki.
Manera ta konosí, djis despues ku e asesinato a tuma lugá, outoridatnan a risibí informashon ku den área di shut lo mester tin un vehíkulo na kandela. Mesora a lanta e rumor ku e vehíkulo aki lo mester tin algu di aber ku e kaso di asesinato.
Mas despues outoridatnan a konfirmá ku e vehíkulo aki lo mester ta vehíkulo ku e sospechosonan a hui aden.
Sr. Huggins a deklará ku ta hasiendo investigashon rondó di e vehíkulo ku a keda kimá.
Ainda no por logra saka afó si ta trata di un vehíkulo prosedente di ladronisia òf si ta trata di vehíkulo di un persona ligá ku e kaso di asesinato.
Esaki debí ku e number di chasis a keda un tiki afektá dor di e kandela i no ta bon visibel pa por kontinuá ku e investigashon.
Loke si ta sigur, ta ku ta trata di un vehíkulo SUV.
P’esei ta hopi importante pa komunidat kompletu duna un man pa asina yuda solushoná e kaso aki tambe mas pronto ku ta posibel.
Bron: Extra