WILLEMSTAD.- Ayera tardi e notisia tristu a yega redakshon di EXTRA tambe. E artista tan kerí kurasoleño Nena Sanchez a fayesé. Ounke nos no a logra haña kontakto ku e famia, EXTRA kier a dediká algun palabra di konsuelo na nan i pa rekordá tur hende ken ta e gran artista aki.

Nos ta sigur si nos djis menshoná un di e kayanan smalitu den Punda, ku dekorashon ku por mira for di Breedestraat, nos ta sigur ku tur hende lo sa ta ken nos ta referí na dje.

Nena Sanchez ta un amante di arte for di chikí. Ku su 18 aña el a partisipá na kòntèst di arte i for di einan su arte a keda skohe pa bai den eksterior den e kaso aki México pa kompetí.

Nena ta un di e famoso damanan ku a saka kara di Kòrsou den Miss Universe. Na 1966 el a partisipá na e kòntèst aki i a keda skohe komo Miss Amity. Nena a biba un temporada na Venezuela kaminda el a sigui estudio den dekorashon interior.

Despues di 25 aña den eksterior Nena a regresá Kòrsou na 1994 i ta kuminsá ku su kolekshon di pinturanan usando kolonan briante i tur loke tabata rondon’é na Kòrsou manera mata, naturalesa i hopi mas.

Nena tin su galeria di eksposishon tambe na Jan Kok kaminda hopi turista a haña nan kaminda pa konosé Kòrsou mas di aserka, for di e bista di un artista.

Segun nos informashonnan Nena Sanchez a fayesé pero sigur a laga Kòrsou ku rekuerdonan sumamentu bunita atras.

Bron: Extra