WILLEMSTAD. – Awe abogado mr. Hubert ‘Berti’ Braam ta manda un karta pa Minister ku e anunsio pa e Hefe di Departamento di Inteligensia di Kòrsou (VDC) bai bèk su trabou.

Esaki ta despues ku Ministerio Públiko a investigá si e hefe Michael Römer lo a kometé echonan kastigabel, pero ku nada kastigabel no a sali for di e investigashon realisá.

Abogado Braam ku tin e interesnan di Römer na su enkargo a duna di konosé ku Ministerio Públiko a mand’e un mail i notifik’é ku su kliente ta liber di echonan kastigabel i basá riba e punto ei e ta di opinion ku no tin motibu mas pa sigui tene su kliente riba “non actief”.

Braam ta ferwagt riba un proseder sin opstákulo i ta keda pendiente un kontesta positivo di Minister pa su kliente reanudá trabou.

Manera ta konosí tabatin rumornan insistente ku Römer lo mester a saka arma di kandela pa un persona hende muhé.

Ounke ku no tabatin denunsia hasí, Prokurador-General, for di su responsabilidat di por investigá sin ku tin denunsia, mirando e seriedat di e akusashon i e poseshon di e persona en kuestion, a disidí dia 11 di òktober 2016, pa duna Landsrecherche e enkargo pa inisiá un investigashon di echo.

Meta di e investigashon di echo ta pa haña sa kiko bèrdat a pasa i pa identifiká si tin sospecho di un echo kastigabel.

Minister Públiko a konkluí su investigashon i a duna di konosé ku nan no a konstatá nada kastigabel kontra di e hefe di VDC.

Esaki a pone ku awe abogado Braam ta manda un karta pa su kliente bai bèk trabou.

Bron: Extra