WILLEMSTAD.- Un dje moshonnan ku a keda aseptá ayera den parlamento t’esun pa para e proyekto di 5.6 mion for di universidat di sr. Carl Camelia i pa duna 300 mil florin na ORV ku tambe por duna estudio di bachelor di polis.
E moshon a keda aseptá ku 13 voto pro i 6 kontra. E moshon a keda entregá pa e bloke di 11 parlamentarionan ku tin mayoria den parlamento.
Dos luna pasá, 7 desèmber parlamento a aprobá un montante di 5.6 mion florin pa e universidat di sr. Camelia ICUC International (ICUC Int’l) B.V., por kuminsá duna estudio “bachelor” na polisnan.
Segun e motivashonnan ku a bin dilanti ta ku e universidat no ta unu aktivo. No tin lugá den kuerpo polisial pa hende ku kaba tal estudio por traha. Mester pidi un TOR i tene un destaho públiko pa e universidat por a haña e suma di 5.6 mion florin, pero nada di esaki a tuma lugá.
P’esei ta disidí pa gobièrnu para proseso di implantashon di entrega di e 5.6 mion florin na ICUC, i laga Kontrolaria General hasi investigashon profundo riba e meta dje universidat. Ta urgi gobièrnu aloká 300 mil florin pa ORV den 2017 i duna sra. Falbru direktor di ORV e outoridat pa firma e akuerdo di intenshon ku ICUC.
Segun señor Schotte esaki ta un dje moshon ku a trese e promé krísis den gobièrnu. Ora MAN a disidí firma huntu ku e eks miembronan ku ta sostené gabinete Whiteman pa dal bai ku e universidat aki.
“Un universidat ku adrès di su kantor ta na Cas Grandi. Si tabata na Bankwerkersweg na adrès di Cicely van der Dijs, nan lo no a warda e moshon pasa i lo a tira inval mesora. E 5.6 mion florin a bai pa kasá di un minister di PNP”. Finalmente e votashon a tuma lugá i a keda aprobá ku 13 voto pro i 6 kontra. Pues ta pidi pa para e proyekto di universidat di sr. Camelia i laga Kontrolaria General hasi investigashon.
Vota 13 pro i 6 kontra.
Bron: Extra