WILLEMSTAD.- United Telecommunication Services N.V. (‘UTS’) a tuma nota di e veredikto di Korte di Apelashon. Korte di Apelashon, igual ku Korte di Promé Instansia i UTS, ta di opinion ku e tarea legal di Algemene Rekenkamer Curaçao (‘ARC’) ta limitá na investigá prosesonan di e Pais (‘Het Land’) i su órganonan.

UTS i su kompanianan afiliá no por ser konsiderá komo parti di ‘Het Land’ i su órganonan, ku konsekuensia ku e investigashon ku a ser anunsiá dor di ARC riba enkargo di Staten, no tin base legal.

ARC por lo tantu, no ta outorisá pa realisá e investigashon ku a ser anunsiá, i UTS lo no duna kolaborashon na esaki. Sinembargo, UTS lo kooperá semper ku investigashonnan debidamente outorisá i anunsiá pa su akshonistanan.

Ku e veredikto akí, UTS ta spera ku awor tin sufisiente klaridat den e asuntu akí, i ku UTS por enfoká atrobe kompletamente riba su tarea pa brinda servisio di telekomunikashon na nivel haltu den e tempunan akí ku ta kargá ku diferente reto.

Bron: Extra