WILLEMSTAD.- Ku fuerte insistensia EXTRA ta risibí informashon ku e kaso di tripel asesinato ku a tuma lugá dilanti Campo Alegre Resort djadumingu mardugá alrededor di 03.55’or, ta reglamentu di kuenta relashoná ku e dòbel asesinato di Esmeraldaweg ku a tuma lugá dos siman pasá.

Djadumingu mardugá Sentral di Polis a risibí diferente yamada tokante di un kaso di tiramentu serio ku a tuma lugá riba e lugá di stashoná outo di Campo Alegre Resort situá riba Seru Fortunaweg.

Manera ku e promé unidat polisial a yega na e sitio a topa tres hòmber drumí na suela riba e lugá di stashoná outo, sin ta ta duna señal di bida.

Tur tres tabatin vários perforashon di bala rònt di nan kurpa.

Dòkter di polis ku a presentá na e sitio a konstatá morto di e hòmbernan: Richenelo L.R. Emerencia, nasé dia 13 di febrüari 1994; Cristen Y. Leonard, nasé dia 26 di mei 1995; Irvin M. Rosa, nasé dia 16 di yanüari 1981. Tur e tres víktimanan aki ta nasé na Kòrsou.

Na e sitio, personal di Team Forensiko a konfiská un kantidat grandi di kashi di bala loke ta indikativo ku ta arma pisá a keda usá pa kometé e likidashonnan aki. Riba òrdu di fiskal di Ministerio Públiko a konfiská e kurpanan pa mas investigashon.

Di akuerdo ku e informashon ku EXTRA ta manehá, mesun kos ku den e kaso di Esmeraldaweg, segun a komprondé tin personanan ku no tabatin nada di aber ku e problema, a pèrdè nan bida djis komo ku nan ta asosiá ku esun ku tabatin plan pa likidá.

Esaki ta nifiká ku den e reglamentu di kuenta ku tin aktualmente no ta tene kuenta ku esun ku no ta den nada.

EXTRA a kombersá ku Bosero di Polisial sr. Imro Zwerwer ku a duna di konosé ku probablemente awe mando polisial lo sinta ku e tim di maneho pa determiná kua ta bai bira e plan di akshon pa atendé ku e tipo di kasonan aki.

Un kos ta sigur e tim di mantenshon lo kontinuá ku e akshonnan riba kaya. E timnan aki ta dunando bon resultado ku kontrolnan dirigí riba arma i droga den outo. Anto ta bon pa bisa ku e kasonan di personanan ku ta move ku arma a baha drástikamente debí na e kontrolnan aki.

Kasonan di likidashon ta henteramente otro un asuntu i ta bon pa komunidat ta konsiente ku Kuerpo Polisial mester di koperashon pa por frena e fenómeno ku ta kousa pániko.

Nos por sa di antemano ken ta bai kometé un likidashon. E úniko manera ta si un informante yama duna e informashon al respekto.

Zwerwer a bisa ku na vários okashon el a mustra riba e responsabilidat di mayornan pa wak nan yunan. Si bo yu presentá ku kosnan di balor ku bo sa ku e no tin sèn pa kumpr’é atendé seriamente kuné. No permití e kosnan sali fo’i man na kas paso despues e nifiká un problema pa komunidat.

Bron: Extra