Mas mama di yu ku ta keda usá pa transportá koka den parti íntimo

WILLEMSTAD.- Tristu i lamentabel pa mira damanan mama di yunan riska nan bida i nan libertat dor di laga usa nan parti íntimo pa transportá droga.

Hopi bia ku e damanan aki ta pará dilanti hues nan ta ekspresá nan doló i bisa ku nan a hasi esaki pa haña sèn pa nan yunan kome un par di dia.

Liña kòrá den hopi di e kasonan aki ta ku e tata no ta kria e yunan di kual esaki ta pone ku e mamanan ta hinka nan mes den e problema aki.

Pa ku esaki e dama akusado M.O.( 38) ta un di e mamanan ku ta keda akusá pa transportashon di un kantidat di droga.

E no a presentá den sala di korte pa tratamentu di su kaso. E ta keda akusá ku na luna di febrüari último, el a trata na eksportá un kantidat di 455 gram di koka den un kondon den su parti íntimo.

E dama sospechoso su kaso a keda tratá tòg, mirando ku el a risibí su dagfar den su man, na momento ku el a keda deten’é. Segun fiskal ora ku e akusado a yega Hato, outoridatnan konserní a tuma nota ku e dama tabatin indikashon di tin algu sospechoso den su interior.

Na momento ku nan a aserk’é pa skèn, el a akseptá i a hasi esaki boluntariamente.

E dama a atmití su kulpabilidat i a saka e kondon e mes.

El a bisa ku e mester a transportá e droga pa un hòmber ku el a konosé na un fiesta.

Segun e dama e mes a paga su ticket i lo a risibí 3 mil euro pa e trabou.

El a bisa ku e ta mama di dos yu i no tabatin trabou figo. Esei a pone ku el a akseptá e oferta i bai di akuerdo pa transportá e droga.

Fiskal a tene kuenta ku ta pa promé bia e akusado ta hañ’á den man di hustisia.

Mirando esaki e ta keda demandá na 12 luna di kual 6 kondishonal mas 3 aña di prueba. Su abogado a bisa korte pa tene kuenta ku e situashon personal di su kliente i tambe ku el a koperá bon ku hustisia

Al final hues a bisa di ta bai di akuerdo ku e demanda di fiskal.

Bron: Extra