Konènchi morto tur na karpata deskubrí den frizer di restorant | Extra

WILLEMSTAD.- Ayera funshonarionan di MEO i tambe Ministerio di Salubridat a hasi un bishita na New Island Bar ku ta keda na Kwartier.

Esaki pa tene un kontrol prinsipalmente riba pèrmit i tambe higiena di establesimentu.

Durante di e kontrol a konstatá ku e establesimentu no ta disponé di un pèrmit di horeca.

Konsekuentemente nan tabata bende bibidanan alkohóliko sin ta disponé di un pèrmit pa hasi esaki.

Tambe a haña un kantidat di buki ku ta wòrdu usá pa benta di number ilegal.

Preisnan riba produkto tampoko no tabata visibel manera lei ta indiká.

Pa loke ta trata e parti di higiena a konstatá ku e kushina tabata hopi sushi manera kos ku e tin hopi tempu sin haña un limpiesa.

Na momentu ku e funshonarionan tabata habri frizer pa kontrolá a topa ku un kantidat di konènchi ya morto i tur na karpata poné den e frizer huntu ku karni, galiña i vários otro kuminda ku por sierto tabata poné habrí den e frizer aki.

Aparte di e konènchinan morto tambe a haña un kantidat di bala spesial ku ta usa na momentu ku ta yag bestia.

E funshonarionan mesora a sera e establesimentu aki i e lo permanesé será te dia ku propietarionan duna e establesimentu un bon limpiá i pone tur dokumento na òrdu.

Bron: Extra