Kaso liga ku “Troya” tratá den korte di Zwolle

WILLEMSTAD.- Dia 5 di sèptèmber próksimo lo tuma lugá den korte na Zwolle tratamentu di e kaso “Cymbal” den forma di un “regiezitting”. E kaso aki ta hala atenshon pasombra e ta hopi liga ku kaso “Troya”.

Pronto por spera desaroyo riba kaso “Troya” aki na Kòrsou tambe di parti Ministerio Públiko. E kaso “Cymbal” ta trata di e famia komersiante Grynsztein. E kaso lo inisiá pa 9:30 di mainta den sala di korte na Zwolle.

Ministerio Públiko di Zwolle ta akusá e sospechosonan, tur famia, ku na Kòrsou nan a partisipá na un organisashon kriminal, ku a laba miónes di euro pa terseranan dor di tuma plaka kèsh, i pa despues depositá esakinan riba kuentanan den eksterior.

E labamentu di plaka a keda tapá dor di vários falsifikashon i tambe dor di engañá instansianan finansiero di gobièrnu.

For di investigashon dor di un tim di polis i FIOD a resultá ku pa labamentu di e plaka a usa e asina yama “turismo di dòler” for di Venezuela (kumpramentu engañoso di lingerie ku tarheta di krédito a kambio pa dòler kèsh).

P’esaki e komersiantenan tata i dos yu, a usa nan negoshi di lingerie komo “kapa”. Pa labamentu di e plaka i sirkulashon dje plaka, e sospechosonan a hasi mal uso di sistema finansiero ulandes.

Dia 7 yüli 2015, aki na Kòrsou outoridatnan a tene entrada den ofisina dje negoshantenan den Columbusstraat, kaminda bastante plaka kèsh a keda konfiská. A hasi detenshon tantu na Kòrsou komo na Miami i Ulanda di miembronan di e famia.

Bron: Extra